Avropa-Qafqaz-Asiya beynəlxalq nəqliyyat dəhlizinin (TRACECA) əhatə etdiyi ölkələrdə dəmir yolu qaimələri rəqəmsal formada tərtib edilməlidir.
“Son-xeberler” xəbər verir ki, bunu TRACECA-nın Baş katibi Aset Asavbayev Bakıda BMT-nin Mərkəzi Asiya Ölkələrinin İqtisadiyyatları üçün Xüsusi Proqramı (SPECA) SPECA Həftəsi çərçivəsində keçirilən “SPECA regionunun qlobal miqyaslı rabitə qovşağına çevrilməsi” mövzusunda iqtisadi forumda bildirib.
Onun sözlərinə görə, bu məsələ dəmir yolu sahəsinə aid tərəfdaşlarla müzakirə olunub və bu istiqamətdə böyük iş aparılıb.
“Bu ilin may ayında birgə işin nəticəsi olaraq 5 TRACECA ölkəsi memorandum imzalayıb. Bu elektron elektron əmtəə-nəqliyyat qaiməs (CMR) ilə bağlı razılaşmadır. Bunun əsasında İşçi Qrupu formalaşdırılıb, Tədbirlər Planı razılaşdırılıb. Burada bir sıra hüquqi, texniki, təşkilatı işlərin görülməsi planlaşdırılır. Hazırda alt qrupun informasiya texnologiyaları ekspertləri rəqəmsal model hazırlamağı hədəfləyir”, – deyə o qeyd edib.
Xatırladaq ki, TRACECA proqramı 1993-cü ilin may ayında Qafqaz və Mərkəzi Asiya ölkələrinin (Azərbaycan, Ermənistan, Gürcüstan, Özbəkistan, Qazaxıstan, Qırğızıstan, Tacikistan və Türkmənistan) ticarət və nəqliyyat nazirlərinin iştirakı ilə Brüsseldə keçirilmiş konfransda irəli sürülüb. Konfrans iştirakçıları TRACECA texniki yardım proqramının icrasını nəzərdə tutan Brüssel Bəyannaməsi qəbul edib. 7-8 sentyabr 1998-ci il tarixlərində Bakıda 9 ölkənin – Azərbaycan, Bolqarıstan, Gürcüstan, Qırğızıstan, Moldova, Rumıniya, Türkiyə, Özbəkistan və Ukraynanın dövlət başçıları, 13 beynəlxalq təşkilat və 32 dövlətdən nümayəndə heyətinin iştirak etdiyi Tarixi İpək Yolunun bərpasına həsr olunmuş beynəlxalq konfrans keçirilib və TRACECA Proqramı əsasında “Avropa – Qafqaz – Asiya dəhlizinin inkişafı üzrə beynəlxalq nəqliyyat haqqında Əsas Çoxtərəfli Saziş” imzalanıb, Bakı Bəyannaməsi qəbul edilib.
