Yayımlandı: 9 Sentyabr 2023 18:55
Belçika yığması ilə oyunun taleyini bir qol həll edib
Futbol üzrə Azərbaycan milli komandası sentyabrın 9-da Avropa çempionatı-2024-ün seçmə mərhələsində növbəti oyununu keçirib.
İtaliyalı mütəxəssis Canni De Byazinin baş məşqçisi olduğu yığma komanda 5-ci tur çərçivəsində Belçika millisi ilə üz-üzə gəlib
Belçikalılarla qarşılaşma Bakıdakı “Dalğa Arena” stadionunda keçirilib.
Azərbaycan millisi AÇ-2024-ün seçmə mərhələsində bundan əvvəl keçirdiyi ilk üç oyunda cəmi 1 xal qazana bilmişdi.
Belçika yığması ilə görüş də Azərbaycan millisi üçün uğurlu olmayıb. Qonaq komanda Bakı səfərində 1:0 hesablı qələbə qazanıb. Bu məğlubiyyətdən sonra Azərbaycan yığması yer aldığı F qrupunda 1 xalla sonuncu pillədə qalıb.
F qrupunda Belçika və Azərbaycandan başqa, Avstriya, İsveç və Estoniya yığmaları da mübarizə aparır.
Azərbaycan yığması sentyabrın 12-də İordaniya millisi ilə yoldaşlıq oyunu keçirəcək. Həmin qarşılaşma da “Dalğa Arena”da təşkil olunacaq.
